This fire is out of control

Son máis partidarios das respostas que das preguntas. Visto o visto co dos incendios só se me ocorren preguntas:

¿Por que a maioría dos concellos afectados polo lume non están gobernados polo Partido Popular e se sitúan nas cercanías das cidades e das vías de comunicación principais? ¿Por que non arden desta volta as inmensas masas forestais abandoadas de Lugo e Ourense? ¿Por que moitos alcaldes de diminutos concellos cuxa existencia é maís que cuestionable non aceptaron o modelo máis racional proposto pola consellería de Medio Rural?

¿Por que cando un narcotraficante ou o asasino dunha rapaza entra nun xulgado é acosado por unha marea humana que o esnaquizaría se lle desen a oportunidade? Non digo que sexa unha situación desexable pero... ¿Por que hai esa falta de escarnio público cos incendiarios? ¿Por que non hai reportaxes de perfil con música de película de terror sobre as escuras motivacións desta xente? ¿Ata cando a impunidade social?

¿Se realmente as sospeitas sempre recaen nos mesmos colectivos (as compañías de hidroavións e os reténs, os pastores e cazadores, os madereiros-aínda que discrepo con esta teoría, e as intereses inmobiliarias - absurdo coa nova lexislación) porque non se fai un seguemento como se fai con terroristas, narcos ou delincuencia organizada?

¿Fai falla saber galego para apagar un lume? A isto respondo eu: non. ¿Fai falla saber o idioma dun sitio para traballar na administración pública? O sentido común dime que si. Por outra gustaríame saber se nos estatutos de El Mundo pon que hai que saber español ou non ser analfabeto para dirixir o xornal...

¿Hai un problema de falta de medios para acabar co lume? Depende de como se mire. Vai en contra da lóxica ter un sistema para aplacar as lapas, e o de Galicia é do mellor do mundo, pensado para atender incidencias nas catro esquinas da comunidade e con focos estratéxicos. Para acabar con iso farían falla un equipo de intervención antiterrorista, CSI e Chuck Norris. A solución real é a prevención (ao que moitos alcaldes do PP se negaron), os cortafogos, limpar o monte, condeas duras para os incendiarios e acabar coa impunidade social. ¿Feijoo e Rajoy apagando o lume cunha mangueira de xardín son axuda? Para provocar o vómito únicamente.

¿Ten solución o problema dos incendios se a poboación non vé a natureza cun valor? ¿Farían o mesmo cos edificios, os barcos, os restaurantes de marisco e churrasco ou coa catedral de Santiago? Na miña breve estancia en Cataluña a xente estaba consternada porque había un incendiario que anda a prender lume por aí. Non entendían como alguén podería ser tan ruín e imbécil. E esa é a pregunta máis dura. ¿Como podemos ser tan imbéciles e ruíns? ¿Merecemos algo mellor ca isto realmente?

E unha última hipótese arriscada: ¿É Alex Kapranos, cantante de Franz Ferdinand, o Gran Responsable de incitar á xuventude galega a queimalo todo despois do seu gran peche de actuación en Vigo? ¿Son gafapastas modernillos que equipados con queroseno, Converses e gafas de pasta van nos seus coches tuneados e con Bowie soando no coche os que fustigan á galicia escura e real?