Hai que votalos (especial campaña): Chalets, autobuses, salas de festas

Segundo post de campaña electoral e xa estou dela ata o carallo.
Fraga segue a apostar polo discurso duro. "Empézase polo que hai por aí e acábase co Exército Guerrilleiro Galego Ceibe... Que a min me fixeron estoupar un chalet que bos cartos me custou." O que non explicou foi por qué lle tivemos que pagar tres veces o chalet. Despois falou das cousas asquerosas que acontecían nos matrimonios homosexuais ( este é un tema recorrente)e animou a que a xente fose votar aínda que fixese día de praia. "Primeiro imos votar e logo xa veremos". Sería interesante unha xuntanza pepera dos carretados para ir despois á praia. Apostan por grandes auditorios, onte Ourense e outro día Silleda. Paréceme a campaña máis acertada.
Emilio, pola súa banda presenta o seu autobús. Non creo que se desprace por el porque se son tan celéricos coma os da empresa Monbus (unha das tantas empresas do réxime que espero que caia cun cambio de goberno). Emilio aburre menos en fotos que falando. Outro día falarei dos slogans aínda que non me resisto a salientar o xogo de palabras entre o seu apelido e o eslogan "Muvémonos".
Quintana, supoño, terá un chalet de pedra no extraradio dunha cidade coma todo bo alto cargo do bloque. Un autobús creo que non. O que si é afeccionado ós aforos pequenos, seguramente por medo a non enchelos polo que todo ten un aspecto como de concerto de Juan Pardo. (Por certo que vin a resurección de Xil Ríos en varios programas da Nosa Televisión) Preocúpanme as camisetas dos mozos que están detrás de Quin. Parecen extraídos dunha novela de ciencia ficción de Suso de Toro. E se aínda fose de Asimov...