Mundo confuso

En 1986 o grupo Genesis publicou unha canción chamada Land of confunsion sobre a situación política de aquel tempo polarizada polo que se deu chamar Guerra Fría e a disuasión nuclear. O video, o primeiro que vos ofrezo, acadou tal celebridade que a Wikipedia lle adica un apartado. Nel a través dos guiñois británicos Spittin Image seguramente ata a súa xusta medida e úsase e abúsase do humor disparatado introducindo dinosaurios e cabezas de monicreques de famosos que axudan a dar un ton macabro ao vídeo.

Recentemente puiden ver nunha canle de videos musicais unha versión desta canción realizada polo grupo Disturbed. Neste caso trátase dun filme de animación creado polo antigo debuxante de Spiderman e creador de Spawn Todd MacFarlane.

A canción é practicamente calcada, a versión de Disturbed máis metaleira e prescinde do meloso á par que odioso Phil Collins, pero os vídeos parten de perspectivas totalmente diferentes. No de Disturbed óptase por contarnos unha historia de superhéroes, de bos e malos realizándose acusacións moi directas (ao capital, aos presidentes das nacións máis importantes do mundo) e representando aos malos cunha clásica estética Nazi. O heroe é totalmente sinistro, non o invitaríamos a cear a casa a menos que el trouxese o viño, e a solución do conflito parece ser a rebelión armada.

No vídeo dos Genesis óptase por unha parodia na que todos os protagonistas son caricaturas de si mesmos. Tal como acontece no video de Disturbed faise un percorrido xeopolítico de aquel momento e introdúcense elementos surrealistas coma os dinosaurios, a cama-piscina chea de suor etc Non hai un enfrontamento violento, non aparecen as masas oprimidas e en todo o momento téndese a ridiculizar aos protagonistas ata o paroxismo final no que Reagan destrúe o mundo porque quería pulsar o botón de Nurse (enfermeira) na vez do de Nuke (bomba nuclear).